صالة قمار شعر محمد عبد الجواد
هو ده حال الوطن
الكل شارب واتسطل
من الجراح ومن المحن
الكل عامل نفسه فاهم
الكل عارف سكته
ومفيش تفاهم
آآآآآآآآآآه يا بلد
الشعب فيكى كله واهم
**************
ورق ورق
قسم وفرق فى الورق
سيبك من اللى فى يوم زهق
ادى العصابة اتجمعت
قعدت وبتعد الورق
واتجمعوا فى صالة قمار
والشعب كله طلع حمار
معرفشى مرة ياخد قرار
عشان مرتبشى الورق
**********
فرق يا بيه
وادينى كاس
من ويسكى أو بيرة ونبيذ
أو حتى من منقوع عرق
واللى ما لوش فى القاعدة دى
يشوف له حلة من المرق
************
قسم وفرق
واياك تحمرق
أنا أصلى سكران من الارق
عايز ولد
بس ياريت يكون ولد
ما يكونشى فى كمالة العدد
عايز ولد زى الاسد
عارف حقوقه ومعتمد
ع اللى رفع لينا السما
من غير عمد
عايز ولد
أشوفه خايف ع البلد
ميكونشى خاين أو عميل
ولا عمره جرب خطوته
فى سكة التمويل
يحمى الحدود
ويكون أصيل زى الجدود
ما هاجرشى ولا ساب البلد
وفى مركب الغربة اتحرق
عايز ولد
شهم وبطل
انا عايزه فاهم
ما يكونشى واهم
يجى يرتب لى الورق
************
ونقول كمان
قسم يا بيه
بس انتبه
لازم تفنط لى الورق
ادينى بنت
تكون كمان زى القمر
وتكون قدر
خمرية لون طين البلد
عارفة فرائض ربها
تحمى بلدها بعمرها
ومربياها امها
ما تكونشى لابسة الشفتشى
والشعر سايب على الكتاف
وفى أى ثورة أو مظاهرة
يشيلها واد خنفس خسيس
فوق الكتاف
علشان شعار .. علشان هتاف
عايزها واعية مثقفة
صاينة شرفه وعرضها
سمعتها سابقة اسمها
وقت المحن تحمى الوطن
تفديه بروحها ودمها
بنت بصحيح
مش ناسية دينها وفرضها
وقلبها على أرضها
وتكون سفينة فى وقتها
تنقذ وطنها من الغرق
***********
ورق ورق
الكل مفضوح ع الورق
قسم كمان يا محترم
وادينى شايب
بس اوعى مرة تجيبه عايب
انا عايزه راجل محترم
حافظ تاريخه
وعمره أقدم م الهرم
عجوز صحيح
لكن مصحصح
عامل كفيف
لكن مفتح
اوعاك تجيب لى بتاع سبح
أو حتى تاجر للبخور
فلما مخه يتمسح
يسرق لى صندوق النذور
الشايب الحق وحقيق
راجل دقيق
عارف دهاليز البلد
حافظ ولادها نفر نفر
عارف كمان
مين اللى مات
ومين اتولد
لأنه حتة م البلد
*********
خلصت تقسيمك خلاص
طب قولى راح فين الخلاص
لسه لى ورقة م الورق
فنط كمان وادينى كومى
قربت أطلع من هدومى
والحزن بيزود همومى
الناس بتقتل بعضها
من غير هدف
من غير رسالة
الكل بقى عايش عوالة
الكل أصبح بلطجى أو عربجى
اخلاقنا شنقت نفسها
ما بقتشى عارف
هو بكرة هيبقى يومهم ولا يومى
**************
خلاص خلاص
الكل فى صالة القمار كشف الورق
الكل جواكى يا مصر بيتحرق
وأنا عمرى فى هواك اتسرق
ملعون أبوك يادى الورق
0 التعليقات: